Setjum Listaháskólann og tengda starfsemi niður í jaðar Miklatúns

Af hverju eru menn að reyna að koma of stórri og klossaðri byggingu Listaháskólans niður á Laugaveg þegar nóg er landrýmið á Miklatúni?  Túnið hefur alltaf litið út eins og borgin hafi aldrei vitað hvað hún ætlaði sér með þetta svæði.  Nú er tækifæri til að  laga þetta svæði til og færa meira líf inn á það. 

Það er kjörið að nýta þennan mikla reit í þágu listarinnar.  Miklatúnið er "miðsvæðis" í gamla bænum og gæti því orðið miðstöð menningar og listar þjóðarinnar á einum besta stað í borginni.  Með því að setja byggingar í jaðar túnsins sem þjónuðu allri tegund listar þá rammaðist svæðið af og þarna yrði innri garður með mjög fjölbreytt mannlíf allt árið.  Það væri hægt að koma fyrir litlum verslunum og kaffihúsum á jarðhæð þeirra bygginga sem þarna yrðu byggðar og leggðu áherslu á menningarlíf þjóðarinnar.  Tónleikahald og aðrir lifandi listviðburðir gætu svo átt athvarf í garðinum.  Með þessu gæti listasnobbið og við hin setið á kaffihúsi, rölt á milli vinnustofa listamanna og verslana og notið okkar út í ystu æsar á mjög fallegum stað. 

Athugasemdir

[Bjarni Kjartansson, 11.8.2008 kl. 15:43]

Betri staður er fyrir bygginguna á n enda brautar 01 á Rvíkurflugvelli.

Gott að gegni, flottur staður og þá er hægt að minnka flugvöllinn niður í eina braut í bili, þar til hann fer með öllu úr Vatnsmýrinni og við endurheimtum það sem tekið var af okkur herskildi.

Miðbæjaríhaldið

Með staðsetningu storra bygginga á hreinu.

[DanTh, 11.8.2008 kl. 16:49]

Þetta er ágætis tillaga hjá þér Bjarni og ég get vissulega tekið undir hana.  Mín hugmynd með því að nefna Miklatúnið er sú að með því að koma "allri" listinni inn á Miklatúnið, þá muni Kjarvalsstaðir tengjast miklu betur því listalífi sem er í borginni.  Húsin sem yrðu byggð þarna þyrftu vissulega að taka tillit til síns nánasta umhverfis.  Svo er þarna stutt í miðbæjarlífið sem mér sýnist þessir aðilar vilja tengja sig við.  Nú ég tel þær götur sem eru þarna ættu að ráða við flæði umferðarinnar þegar Miklabrautin er komin í stokk.  Þá flæðir sú umferð framhjá hverfinu sem ekki á erindi inn í það.

Hvað flugvöllin varðar þá er það mín skoðun að hann ætti að fara út á löngusker.  Ég skil ekki tregðulögmálið í þeirri umræðu, það vantar stórhuga menn sem hafa framtíðarsýn í þeim efnum.  Ég get farið út í nánari útlistanir á þessu en það yrði líklega of langt mál hérna.  Það á svo að stöðva byggingaráform Landspítalans á þessu svæði.  Honum á að koma fyrir í Fossvoginum og þá með tengingu þaðan út í Háskóla ef það er talið nauðsyn.  Samþjöppun svona stórra stofnanna vestan við Snorrabraut er bara ávísun á ófremdarástand í umferðarmálum.

[Jón Steinar Ragnarsson, 11.8.2008 kl. 19:28]

Ljómandi tillaga hjá þér Davíð og vel gerleg, auk þess sem húm leysir fleiri en einn vanda. Ég er sjálfur MHÍ maður og lærði í Skipholtinu, en mér finnst bæði það hús, sem lagt er til og staðsetningin algerlega út úr kú. Ég hreinlega botna ekki í því að listaelítan skuli láta sér detta þetta í hug. Miklatún er annars mjög hlutlaust svæði fyrir hverskonar byggingarstíla. Í leiðinni mætti þá láta verða að því að setja Hringbrautina í stokk þarna, eins og lengi hefur staðið til og jafnvel ganga svo langt að rífa þessa bévítuðu verkamannabústaði Guðjóns Samúelssonar, sem eiga sér varla hliðstæðu nema í Múrmansk.

Ég hvet þig til að til að viðra þessa hugmynd frekar. það yrði svipað menningarslys að troða þessum glerfasisma niður, þar sem ætlað er og dettur manni helst í hg Seðlabankabyggingin ráðstjórnarríkislega, sem hola átti niður á Bernhöftstorfunni í den, eða þá Hamraborgin í Kópavogi (Gunnarsbæli)  

[DanTh, 12.8.2008 kl. 17:14]

Jón, ég tel að Miklatúnið muni ráða við að þarna yrði settur Listaháskóli og tengd starfsemi.  Ég bjó í Norðurmýrinni í sex ár og þekki nokkuð þetta svæði og hvernig það hefur verið nýtt.  Hvað umferð varðar þá tel ég að þegar Miklabrautin er komin í stokk, þá muni menn ekki finna fyrir auknu álagi umferðar um þetta svæði þó svo öll þessi starfsemi komi þarna. 

Tillagan við Laugaveg er að mínu mati óraunhæf bæði útlitslega séð og hvað stærð hússins varðar.  Ég tel þessa starfsemi bara ekkert eiga erindi inn í þrönga verslunargötu eins og Laugaveg.  Menn eru að reyna að mála það einhverri rómantík að setja Listaháskólann við Laugaveginn en í mínum huga er þetta enn ein vitfirringin í skipulagsmálum borgarinnar ef af verður.  Það ríkir einskonar bautasteins arkitektúr hér á landi (sumir kalla hann geðklofa arkitetktúr) þar sem ég tel marga arkitekta fyrst og fremst vera að reisa sér minnisvarða á kostnað nærliggjandi umhverfis og skynseminnar.